"Hauek musika egiteko gai badira, gu ere bai"

“Komando Itinerante” izeneko musika taldea osatzen dute gure auzoko lau mutil gaztek. Iazko urte zaharretan eman zuten euren lehenengo kontzertua Loiolako Gaztetxean, eta ordudanik beste hainbat tokitan ere aritu dira jotzen. Reyerta Fanzineak aurtengo San Inazioetarako antolatutako kontzertuetan parte hartu behar dute Komandokoek, eta galdera batzuk egin dizkiegu taldea pixka bat ezagutzeko asmoarekin.

1. Zeintzuk osatzen duzue Komando Itinerante musika taldea?

Xabier Fernandez de Retana……………. Ahotsa
Beñat Castrillo “Titow”………………... ... Gitarra
Unai Perez “Pelanas”…………………... ... Baxua
Asier Zuazolazigorraga “Potto”………... Bateria

2. Nola sortu zen taldea osatzearen ideia?

Xabi: Aspalditik genuen musika talde bat osatzeko gogoa, 14-15 urte genituenetik! Baina benetako proiektua kontzertu batean egon ginenean sortu zen; talde baten kontzertuan egon ginen, beraien lehen kontzertua zen, eta esan genuen “hauek musika egiteko gai badira, gu ere bai!” (barrez). Horrela elkartu ginen, hasieran Potto, Pelanas eta ni, Pottok bigarren eskuko bateria bat erosi zuen, Pelanasi baxu bat utzi zioten…eta pixkanaka-pixkanaka hasi ginen. Gero Titow elkartu zitzaigun, hasieran berak zekiena irakastera etorri zen, beste talde batean ere jotzen baitu, baina azkenean taldean geratu da.

3. Non eta noiz entsaiatzen duzue?Maiz?

Xabi: Elizpen entsaiatzeko baimena lortzen saiatu ginen baina ez genuen lortu, eta Gaztetxeak orain duen tokia hartu zuenez, bertan entsaiatzen dugu, eta maiztasunari dagokionean… ba orain astean bi egunetan edo entsaiatzen dugu.
Titow: bai zera! Azkeneko kontzertutik ez dugu batere entsaiatu eta! Boladak izaten ditugu.
Potto: Bai boladak izaten ditugu, agian aste batean egunero hemen sartuak gaude eta gero ez gara elkartzen denboraldi batean, libre dugun denboraren arabera izaten da asko. Baina egia da azkenaldian astean bitan elkartzen garela.

4. Zer abesten duzue?

Titow: Gureak abesti gutxi ditugu, beste musika talde batzuen abestiak jotzen ditugu gehienbat.
Potto: Eskorbuto, Cicatriz, MCD, Suburband Rebels…eta horrelako taldeen abestiak jotzen ditugu, beno eta Suburbiorenak ere! (barrez)

5. Nola definituko zenukete jotzen duzuen musika mota?

Potto: Ateratzen dena jotzen dugu! Xabi zein musika mota jotzen dugu?
Xabi: Soinua! Soinua egiten dugu! Ke ba… (barrez). Punka, punka orokorrean.

6. Hemen inguruan ez ezik, urrutiago ere eman dituzue kontzertuak, ezta?

Xabi: Bai Nafarroan egon gara, hiru aldiz gainera. Lehenengo Mirafuentesen egon ginen, hor Nafarroan galduta dagoen herri batean! gero Iruñako Atabal tabernan izan ginen, eta aurten Gazte Topagunean ere izan gara. Gainera laster Goizuetako jaietara ere joatekoak gara.
Baina Gazte Topagunean ez omen zenuten oso ondo jo ezta?
Potto: Desastre, desastre…Nik uste dut okerren jo dugun kontzertua izan dela eta jendeak hoberen pasa duena.
Xabi: Gaizki gaizki, gainera azkeneko eguna zen…beno Topagunerako bidean gindoazela jada arazoak izan genituen, Guardia Zibilek gelditu gintuzten, kontzertu bat ematera gindoazela esan genien, eta noski taldearen izena galdetu zigutenean…hala ere kotxeko atzeko atea ireki eta instrumentuak ikusi zituztenean aurrera jarraitzen utzi ziguten.

7. Ba al duzue kontzertu kuttunen bat? Non jo duzue hoberen?

Titow: Nire ustez okerren jo dugun bi kontzertuetan disfrutatu du gehien jendeak; Topagunekoaz gain, Loiolan ere izugarri gaizki jo genuen eta jendeak asko gozatu zuen kontzertuaz. Hala ere, eman dugun kontzerturik hoberena Minasekoa izan da.
Xabi: Niretzako ez. Nire ustez eman dugun kontzerturik onena Atabal tabernakoa izan da, baina beno hori bakoitzak desberdin ikusten du!
Titow: Nik Atabaleko kontzertu erdia gitarran soka bat gutxiagorekin jo nuen eta!
Xabi: Ba nik gehien disfrutatu dudan kontzertua horixe izan da.

8. Zein da kontzertu bat emateko lekurik aproposena?

Xabi: Eszenatokia jendearengandik gertu dagoen toki bat zalantzarik gabe! Eszenatoki txiki-txikiak dira hoberenak. Bai zeren eszenatoki handietan jo izan dugu, Herrera eta Altzako jaietan esate baterako eta gaizki; soinuaren kalitatea oso ona izan da baina jendea oso beheran ikusten duzu, urruti…jendeak gertu egon beharra dauka, gero beraien gainera salto egiteko…kar-kar-kar

9. Aurten Loiolako jaietan ere joko duzue, zerbait berezia prestatu al duzue?

Xabi: Bai jaietako lehenengo egunean joko dugu Topo aurrean, eta ea jendea animatzen den, auzoko musika talde bakarra gara eta! Eta zer edo zer berezia…beno guk asmatu dugun Loiola izeneko abestia joko dugu, oraindik jende gutxik entzun duena.